tge è il Crestomat?

Dr. Clau vegn tratg viaden en la Crestomazia Retorumantscha dal 19avel tschientaner. Atgnamain na vuleva el gnanc esser là, ma uss è el praschunier da quest mund e sto s'arranschar cun figuras mitologicas sco la Mitta da fain, Sontga Margriata e naturalmain er cun il Buttatsch cun egls. Dr. Clau è il protagonist dal nov comic rumantsch «Il Crestomat» In comic en sis toms narrativs. Gratuit per in e scadin. Da chargiar giu sin tablet e telefonin perdert.

Comic digital

Il comic duai cumparair en il turnus da mintgamai dus mais sco comic digital da var 20 paginas. Per l'ina vegn ins a pudair leger el online sin la pagina www.crestomat.ch, per l'autra al pon ins chargiar directamain sin il tablet u telefonin perdert. Igl è gist ils tablets ch'èn vidlonder da remplazzar ils comics squitschads a moda classica.

Per leger comics datti diversas, excellentas apps gratuitas per iOS ed Android ed er per Windows 8 resp. Windows RT.

Pertge gratuit?

«Il Crestomat» duai animar da sa fatschentar cun la ierta culturala rumantscha. Sche pussaivel senza impediments - era senza in impediment da pritsch.

Lingua

Il linguatg da dialog da las figuras principalas dal «Crestomat» duai reflectar e cumpigliar la variaziun dal rumantsch ord tut las regiuns. Rumantsch Grischun è linguatg editorial. Plinavant vegni a dar en in segund pass translaziuns per talian, tudestg ed englais. La fiera internaziunala da comics englais è detg vasta ed en il mument fitg averta per imputs novs. Purschidas gratuitas en butias da comics digitals sco comixology chattan blera attenziun.
Forsa pudess uschia la cultura rumantscha era chattar ina via sur cunfin ed or en il mund.

Sis artgs narrativs

L'istorgia da dr. Clau en il mund da la Crestomazia vegn raquintada en sis artgs narrativs. Mintgin da quels artgs cumpeglia tschun comics da mintgamai var 20 paginas. Tut en tut cumpiglia il project pia 600 paginas malegiadas. Mintga artg narrativ raquinta bain ina istorgia che stat per sasezza, porta entant tuttina enavant l'istorgia da l'epos entir. Uschia raquinta l'emprim artg sco dr. Clau tschertga ina via ord il mund da la Crestomazia e co in vitget batta cuner la signura da guerra Mitta da fain…